నమ్మలేని నిజాలెన్నో

ఇన్నాళ్లూ మనసు అద్దంలో
నన్ను నేను పరికిస్తూ,
సూపర్ గా ఉన్నా అనుకుంటున్నా!

ఇవ్వాల నిజ అద్దంలో చూస్తుంటే
నమ్మలేని నిజాలెన్నో కన్పిస్తున్నాయి.

తెల్లబడ్డ జుట్టు,
నల్లబడ్డ పెదాలు,
ముడతలు పడ్డ మొఖం,
కళ్ల ముందు బూతద్దాలు
పెద్ద చైనా గంటలా ఒళ్లు!
నిజాలెన్నో కన్పిస్తున్నాయి.

ఇన్నాళ్లూ
ప్రేమ, స్నేహం
కోపం, నవ్వు
మాట, పాట
అన్నీ ఎత్తులే అనుకుంటూ
ప్రయోగిస్తూ విజయాల మెట్లెక్కుతూ
సూపర్ అనుకుంటున్నా.

ఇవ్వాల క్రిందికి చూస్తే
వదిలేసిన చెప్పులూ
విసిరేసిన గొడుగులూ
ఆవల వేసిన వస్త్రాలూ
అందనంత దూరంలో కన్పించాయి.
ఎండా, వానా
కష్టాల్, కష్టాల్
తోడై నిల్చాయి.

రేడియోతో పాడించీ పాడించీ
పొడిబారిపొయిన బ్యాటరీల్లా
ఎవరికోసమో, ఎవరితోనో
ఏదో చేయించి వాడిపొయిన
నిజ రూపం కన్పించింది.